Praza do Toural (Santiago de Compostela) Ás 18:00 horas

No Día dos Dereitos Humanos, o Movemento Galego da Saúde Mental promove o acto “Saúde mental sen ataduras. Contencións cero” , co propósito de dar a coñecer a existencia do uso de contencións físicas de persoas ingresadas, práctica considerada unha vulneración da Convención dos Dereitos das Persoas con Discapacidade (ONU).

O artigo 5 da Declaración Mundial dos Dereitos Humanos declara que “ninguén será sometido a torturas nin a penas ou tratos crueis, inhumanos e degradantes” , e organismos internacionais como a OMS, a ONU ou o Consello de Europa instan a elaborar medidas lexislativas e estratexias de planificación sanitarias que promovan a súa erradicación. Existen experiencias contrastadas que avalan a súa posibilidade real e efectiva.

Como afirma a OMS, “… un ambiente de respecto e protección dos dereitos civís, políticos, socioeconómicos e culturais básicos é fundamental para a promoción da saúde mental. Sen a seguridade e a liberdade que proporcionan estes dereitos resulta moi difícil manter un bo nivel de saúde mental…”

O Movemento Galego da Saúde Mental anima a todas/os a participar no acto que se realizará en Santiago de Compostela.